Сто гадоў шукай другой красы,
А тым больш, што свет зусім не вузкі.
Ды калі ты не бязродны сын,
Гавары са мной па-беларуску.

Яўгенія Янішчыц

 Міжнародны дзень роднай мовы – гэта не толькі нагода для свята, але і магчымасць задумацца пра важнасць моўнай разнастайнасці ў нашым свеце. Кожны з нас можа ўнесці свой уклад у захаванне і папулярызацыю роднай мовы, забяспечваючы тым самым захаванне багацця культурнай спадчыны чалавецтва.

Дзень роднай мовы  ўжо традыцыйна адзначаецца ў нашай установе адукацыі. Сёлета, 20 лютага 2026 года, выкладчыкі беларускай мовы і літаратуры Аляшкевіч Наталля Аляксандраўна і Казлова Іна Рыгораўна правялі для навучэнцаў вучэбных груп Э 2-2, Э 2-3, О 1-1 інтэрактыўную гульню “Сэрцам роднага слова краніся”.

Гульня складалася з пяці прыпынкаў: “Самы кемлівы”, “Загадкі”, “Прадоўжы твор”, “Этнаграфічны”, “Лінгвістычны”. Яна атрымалася цікавай, яркай, пазнавальнай, дынамічнай. У кабінеце панаваў сапраўдны дух спаборніцтва.

У ходзе мерапрыемства маладыя людзі праявілі вялікую цікавасць да роднай мовы і культуры, прадэманстравалі веданне  фальклору, этнаграфіі, паэзіі, папоўнілі свой слоўнікавы запас.

Памятайце: наша мова – гэта наш гонар! Любіце, паважайце і шануйце яе, нашу родную!